كلمات سجينة تنتظر الاعدام

بسم الله الرحمن الرحيم

اخواتي واخواني اعضاء منتدى الواحة الخظراء
تحيبه طيبه

كتبت الكاتبه مشاعل العيسي هذا الكلمات في وصف حال سجينه خميس مشيط

ودي أرجع لأهلي

ودي بأمي ..ودي أحضنها بقووووة ...ودي بزوجي أحب راسه ..ياما وقف معي وياما هل بسببي مدمعه

من ست سنين وانا ما أعرف إلا الموت ...والخوف هو الوحيد اللي أعرفه

ست سنين وانا ما أعرف إلا ثلاث حروف ..ميم وواو وتاء ..موت

كلها حتوف وخوف وأحزان جارفة

صدر الحكم ..وصدقته المحكمة

مابقى على الموت شيء ..يمكن اليوم ..أو بكرة ..

.بس الأكيد اني مت قبل بكرة ..كل يوم اموت في يومي.و.كل يوم أموت البارحة

.............................

لله حكمة بالغة

يمكن أكون عبرة لكل بنت تعيش لحظات سكرة ولهفة ..

مع شاب يقولها كلام الحب وهي تبادله

وتصغي لكلام الحب والعشق وتصدقه

ثم تمر الأيام وتتزوج ...ويوم تبغى تعيش ..تدري ان الماضي شبح يظهر لها كل لحظة في عمرها

في لحظة خفت فيها على نفسي وبيتي وزوجي للي حبيته ..وروحي وروحه متآلفة
بعد ما هددني ..أنه بيفضح سري الطاهر ...ويفقدني حياتي الحالمة ..

ومادريت ان الانسان ...لو نسى هو الماضي

الماضي هو اللي ماينساه وبيظل طول عمره يلاحقه

وفي لحظة

استسلمت فيها للشيطان ...قررت اتخلص منه...وجت اللحظة الحاسمة

ولحظتها مافكرت في عواقب فعلتي ..والخاتمة

قتلته ..أيه قتلته ..وهو اللي بدا ..هو قتل فرحتي ...ونظرتي ...ولحظتي

وعشت أيام وسنين

لا ليلي ليل ولا نهاري نهار ...طول وقتي خايفة

عشت ايام وسنين ..أدفع ثمن لحظة خاطفة


....................................

لاتتركوني مع الموت والعذاب وأنا انتظر لحظة يقولون اسمي .

.لحظة أتقابل أنا والسياف ...والسيف ....

كل يوم افكر في هاليوم ...وعجزت أبعده ....أتلمس حلقي ..رقبتي ..وأتخيل أن السياف بيقطعها قريب ....

وأتخيل راسي ينقطع ..وعروق دمي ..نافرة ...

وأتخيل جسمي لحظة الموت ..ينتفض ويرتجف ...ورجلي جافلة ...ثم تلين ..ثم تسكن .ثم تموت..ثم انتهي

ينتقل جسمي المذبوح ..وأمي تغسله ..وتكفنه ..واخوي يدفنه

وأتخيل الناس ...تصلي علي ...اللي يبكي بحسرة

واللي يدعي علي ويقول ...تستاهل ...

أحسن ..هذا جزاها القاتلة

.................................................. .....

لاذكرت الموت طار النوم عن عيني

وسالت دمعتي

لا نمت ....حلمت

وعشت مع أمي وأبوي وأهلي

أشوف أحلام ...تعطيني الأمل.. وتخليني متفائلة

شايفين كل هالكون الكبير ...وكل هالدنيا الوسيعة ....

كأنها عندي خرم ابره ..وودي لو اني أطير ..واطير

ودي أذوب .ودي أختفي من هالوجود

ودي الناس ماتقسى

ودي كل شيء في هالكون ينسى

ينسى اني ..كنت في يوم ...قاتلة

.................................................

وياحر قلبي على امي ...

تدمع عيوني ..وأنا اتخيل منظر عيونها وهي تبكي على فراقي

أخاف عليها تموت ..بعد ابوي ..وفاة عاجلة

.................................................. .......... ...........


يوماه

ابوي بعد سجني ....مات بحسرته ... عارفة ...

اعذريني ...تراني خذيت منك كل شيء ..أبوي ..

وبنتك اللي هي أنا ...والبسمة ..وخليتك في هالديرة سالفة

يوماه أدعي لي ..تكفين يوماه

تكفين يالغالية

وادعي لكل القلوب اللي معي متعاطفة
.................................................. .........

وينكم

وين الرجاجيل ؟؟؟

ارحموا بنت ضعيفة ......ارحموا بنت هي في الأصل مظلومة ...

لكن البندق خلاها في لحظة ظالمة
.................................................. .......... .......

وين النشامى ؟؟؟

وين الرجاجيل اللي إذا صاح الغريب وصاح الأسير ...يفدونه بارواحهم الغالية

ياأبوي عبدالله ..بنتك بيقتلها السيف ...وأنا بك منتخيه .وبعيرنا عند بابك ناخية

نصيتك ياسلطان الخير ....ودي بخير منك ...وأعظم خير ياسلطان ..أني اعيش من السيف بأمان

يانايف ....أمن قليي.... ... ترى قلبي من الموت خايف

ياسلمان ..ماودي أمي تذوق حرقة فراقي ...وفراق الضنا ...مامثله فراق ..حزنه اعظم الاحزان

.ودي أجلس مع اهلي وزوجي ... ودي أعيش ..ودي أعيش ...ودي أصوم رمضان

ياعبد العزيز ..ياولد فهد ..

الأمير اللي إذا جاه الفقير ..يقول له : ابشر ..وسم

وين اللي كنت أشوفه في الجريده

يحط يده على خشمه ...ويقول للناس : على هالخشم ...ثم تقول أفعاله . : تم
.................................................. .

وين المشايخ اللي عرفوا بقصتي

وعرفوا ...قبيلتي ..وأهلي و الخال والعم

ياشيخ عايض ..وياشيخ سعد

الوقت يمر ...والموت حكمه ...تم ..من المحكمة
يمكن أموت في أي لحظة ...الدقيقة الحين غالية

ست سنين والموت يلاحقني ...ست سنين وأنا في سجني في هم وغم
ست سنين وأنا مايعرفني إلا الموت ...والخوف هو الوحيد اللي أعرفه
ست سنين وانا في سجني ...مااحدن تحرى ما احدن راح لابو القتيل يستسمحه ..ويقنعه

يارب ..المروة تدخل قلوب الرجال ..و ينسون الكرامة ..اللي مالها هالحين لازمة
.ودي بالشهامة وتروح للأبو يستشفعه

وياحظ من أحيا نفس بتموت

كأنه احيا كل الكون بأجمعه

وياسعد من قدم في الدنيا هالمنفعه

يارب اعتق من عتقني

واحيي من احياني
ويارب تمد في عمر من يمدد لي سنيني الخالية

ويارب تعطي من عطاني الأمل

جنة عالية ..جنة عالية ..جنة عالية
..................................

يا أهل القتيل ..سامحوني ..

أنا قاتلة ..واعترف أني قاتلة ...قتلت ولدكم ..
لكنه هو قتلني قبل وبعد

ثمان سنين عشت فيها الموت ..ثمان سنين متواصلة

أخذت جزاي ...وإذا أنتم بتأدبوني ..فتراني تأدبت

والله تبت ...والله ندمت ..والله تبت ..والله ندمت

والله أني نادمة

خلوني أعيش ..واتركوا الموت يجيني في ساعته

يكفيني السجن ..يكفيني الخوف ...يكفيني الوعد بالموت

يا أهل القتيل ..سامحوني ..عدوني ..ميته

وش تخسرون لو عتقتوا رقبة بحبل الموت عالقة

اعتقوني لوجه الله ..لوجه الله ...لوجه الله ...لأجل الله ..

لأجل الله وبس ...يعتقكم الرحمن من نار حارقة

.................................................. .......

لا ذكرت كل هذا

أصيح ..وأصيح وأصيح ...بصوت عالللللي

اتمنى الكون كله يسمعه

ويجيني بكى ....ما اقدر أدفعه

لاذكرت الموت ...تخنقني العبرة ...تخنقني خنق ...

ويوقف الزاد في حلقي وما أقوى أبلعه

وكل ما تضيق ..وتضيق

أفك عن نفسي ,,وأردد ..لو يضيق الكون كله ...عند الله سعة

ولا فكرت بالموت ..ذكرت الله ..وذكرت أن راسي ما يتقطع إلا بأمره

هو اللي خلقني وراسي هو اللي ركبه

وهو اللي إن شاء ...وأراد ...هو بس اللي يقطعه

بعدها ...اتنفس براحة ...وأرتاااح

وأحسن ظني بربي ..وطني ان ربي بيعتقني

أيه هذا ظني

وربي عند حسن ظن عبده به و من نصاه ما ضيعه

وأنام وأعرف أن بكرة بيجي الصبح ..وكل صبح رزقه معه

يارب مالي إلا انت

اعتقني أنت

اعتقني أنت

اعتقني أنت في الدنيا الحين ...وفي الآخرة

يارب صوت العفو ..ودي هاللحظة أسمعه

ودي هاللحظة اسمعه


بسم الله الرحمن الرحيم
اللهم انت الله انت الرحمن انت الرحيم الملك القدوس السلام المؤمن المهيمن العزيز الجبار المتكبر الأول والأخر الظاهر والباطن الحميدالمجيد المبدىء المعيد الودود الشهيد القديم العلى العظيم العليم الصادق الرؤوف الرحيم الشكور الغفور العزيز الحكيم ذو القوة المتين الرقيب الحفيظ ذو الجلال والاكرام العظيم العليم الغنى الولي الفتاح المرتاح القابض الباسط العدل الوفي ولي الحق المبين الخلاق الرزاق الوهاب التواب الرب الوكيل اللطيف الخبير السميع البصير الديان المتعالي القريب المجيب الباعث الوارث الواسع الباقي الحي الدائم الذى لا يموت القيوم النور الغفار الواحد القهار الأحد الصمد لم يلد ولم يولد ولم يكن له كفوا احد ذو الطول المقتدر علام الغيوب البدىء البديع القابض الباسط الداعي الظاهر المقيت المغيث الدافع النافع المعز المذل المطعم المنعم المهيمن المكرم المحسن المجمل الجنان المفضل المحيي المميت الفعال لما يريد مالك الملك تؤتي الملك من تشاء وتنزع الملك ممن تشاء وتعز من تشاء بيدك الخير انك على كل شى قدير تولج الليل فى النهار وتولج النهار فى الليل وتخرج الحي من الميت وتخرج الميت من الحي وترزق من تشاء بغير حساب يا فالق الأصباح وفالق الحب النوى يسبح له مافى السموات والأرض وهو العزيز الحكيم

اللهم ماقلت من قول او حلفت من حلف او نذرت من نذر فى يومى هذا وليلتي هذه فمشيئتك بين يدي ذلك كله ما شئت فيه كان وما لم تشأ منه لم يكن فادفع عن سجينة خميس مشيط بحولك وقوتك فانه لا حول ولا قوة الا بك العلي العظيم اللهم بحق هذه الاسماء عندك نسألك إجابه الدعاء وصلي على محمد وال محمد واغفر لها وللقتيل ولناجميعا وارحمناوتب عليناوتقبل مناومنها واصلح لهاولناشأننا ويسر أمورنا ووسع علينا فى رزقنا وأغننا بكرم وجهك عن جميع خلقك وصن وجوهنا وأيدينا وألسنتناعن مسألة غيرك واجعل لنامن أمرنا فرجا ومخرجا فانك تعلم ولانعلم وتقدر ولا نقدر وانت على كل شى قدير برحمتك يا ارحم الراحمين

وصلى الله على سيد المرسلين محمد النبى واله الطيبين الطاهرين...
°ˆ~*¤§(*§*)§¤*~ˆ°
°ˆ~*¤§(*§*)§¤*~ˆ°
منقول
للفائدة والعبرة

الله يحفظنا وما احد يكون بهذا الموقف
بارك الله فيك
يا صقر
تقبل مرورى

ولله
الحياة كلها عبر
شرفني مرورك
دمتي في حفض الرحمن

البركة في مرورك
دمتي بود وعافية