{المتخلف}؟؟؟؟؟؟

من فترة طالعت سجلت على دورة سواقة لحتى طالع شهادة
قلت لحالي .. حجرة بالايد احسن من ريتا علشجرة
انه واحد ما بيخسر عليها شي
قلة مهندسين عم يشتغلوا شوفيرية ؟
حضرت الكورسات بشكل منتظم وكان الوضع كتير ظريف
باستثناء اني كنت رح اعفسه للمدرب وقت اشرلي علسيارة من بعيد وقلي روح جيبا
جبتا بس انعبطت وما شفت دعسة الفريم

وصلنا وقت الفحص
حددولي موعد ما كان بناسبني بولا طريقة من الطرق
فاضطريت اني غيب عن الفحص واطلع تاني يوم
قلت لحالي انه اللجنة موجودة وموجودة فأكيد بتقدر تفحصني

فتت على المدرسة وشرحت الوضع للجنة اللي هنيك
قالولي روح عود بشي مطرح مريح لأنك دورك مطول
سألتن .. ليش ؟
قالولي انه ما من حقي آخد دور شخص ملتزم بالوقت .. بس يخلصوا كل الطلاب بصير دوري

مسكت هلموبايل وفتحت برتية التركس
وقعدت ............

خلصوا الطلاب تبع الفحص
وصفيت لحالي
ألاقي الاستاذ من جوات السيارة عم يصيح
المتخلفين يجو لعندي
انا بقيت قاعد بمحلي
انه شو خصني بينه وبين المتخلفين ؟
بالأصل شو بعرفني مين هدول المتخلفين
ألاقيه من مراية السيارة عم يزاور فيني
ويعلي صوته
المتخلـــــــــــــــفين يجو لعندي

انه يلعن سماه هلزلمة شو بده ؟

ما ألاقيه إلا وفتحلك هالباب ونزل منه بسرعة السعدان واضعاً الشر نصب عينيه وكأنه رح يقرصني بكماشات الزلعطان
اجا لعندي طلع فيني من فوق لتحت والزبد عم يرغي بتمه وقلي
لك مو انت المتخلف !!
انصدمت من حالي وقت قلتله " إي انا المتخلف "
قلي : وما تتفضل علسيارة ؟
قلتله بتفضل وين المشكلة يعني
تفضلنا ومشي الحال

بالمناسبة
رسبت بالفحص

اضافة : مشان ما تكون نهاية القصة تراجيديا وتبلش الدموع تنزل علاراضي اللي فوق البواب 0 مطرح مو طالعة الطرزانة سابقاً 0
ومشان القلقانين علي بحب خبرن انه الشهادة طلعت والحمد والشكر والتسبيح لجيب الوالد اللي عمله فتلة على اللجنة ومشي الحال
الله وكيلكن
الاستاذ اللي كنت رح اعفسه
اول مين حطلي علامة الجيد لأنجح بالفحص
يضرب الحب شو بذل

؟شكرا لك اخي استاذ صقر وشكرا للصدف الي جمعتنا :ياحر:: مثل الصقر